गत असार १६–१७ मा पूर्वी जिल्लामा आएको बाढी र पहिरोमा जलविद्युत क्षेत्रमा ८ अर्ब ४० करोड रुपैयाँको क्षति भएको थियो । बाढी र पहिरोले ताप्लेजुङ, संखुवासभा, पाँचथर र भोजपुर जिल्लाका विद्युत् आयोजना बगाएर क्षति पु¥याएको छ । प्रधानमन्त्री पुष्पकमल दाहाल ‘प्रचण्ड’सँग स्वतन्त्र उर्जा उत्पादक संघ नेपाल (इपान)का प्रतिनिधिले आज भेट गरी सो कुरा साझा गरेका छन् । सो अवसरमा इपानका अध्यक्ष गणेश कार्कीले विपद्मा १३ सञ्चालित जलविद्युत आयोजना र १७ निर्माणाधीन आयोजनामा क्षति पुगेको र १३३ मेगावाट विद्युत उत्पादन ठप्प भएको बताए । जसका कारण २० लाख स्थानीय जनता र लगानीकर्ता प्रभावित भएको उनले बताए । इपानले क्षतिग्रस्त आयोजनाको पुनर्निर्माणका लागि नेपाल राष्ट्र बैंकलाई पुनर्कर्जा सुविधा उपलब्ध गराउन, उत्पादनको मिति दुई वर्ष थप गर्न, क्षतिग्रस्त आयोजनाले विद्युत् उत्पादन नहुँदासम्म रोयल्टी मिनाहा र उपकरण आयातमा कर तथा भन्सार छुट दिन प्रधानमन्त्रीलाई आग्रह गरेको छ । क्षतिग्रस्त आयोजनाको पुनर्निर्माणका लागि त्यसैगरी क्षतिग्रस्त जलविद्युत आयोजनाको विद्युत उत्पादन अनुमतिपत्रको म्याद ५० वर्ष थप गर्नुपर्ने र पुनर्निर्माणका लागि लिएको ऋण २० वर्ष पुर्नतालिका गर्नुपर्ने उनीहरुको माग रहेको छ । उनीहरुले प्रधानमन्त्रीको भर्खरै भारत भ्रमणका क्रममा नेपालका लागि १० वर्षको अवधिमा १० हजार मेगावाट विद्युत् निर्यात गर्ने सम्झौतालाई पनि सकारात्मक रुपमा लिएका छन् । बदलामा प्रधानमन्त्री प्रचण्डले इपानले उठाएका समस्या समाधानका लागि आफू गम्भीर रहेको बताए । "तपाईंले गम्भीर र सान्दर्भिक मुद्दाहरू उठाउनुभएको छ। त्यसको समाधानका लागि सरकारले सम्बन्धित क्षेत्रसँग मिलेर काम गर्नेछ," उनले भने। उनले इपानको नवनिर्वाचित कार्यसमितिलाई बधाई तथा शुभकामना व्यक्त गरेका छन् ।
