काठमाडौं महानगरपालिका (केएमसी)ले अहिले नै सहरका सामुदायिक विद्यालयलाई मर्ज गर्ने योजना नरहेको स्पष्ट पारेको छ । हाल कामपामा ८९ सामुदायिक विद्यालय छन् । तीमध्ये ५९ माध्यमिक विद्यालय रहेका छन् भने संस्थागत विद्यालयको संख्या ५०४ रहेको छ । महानगरपालिकाले सहरमा सञ्चालित यी सबै विद्यालयलाई स्तरोन्नति गर्ने तयारी गरिरहेको कामपाका शिक्षा विभाग प्रमुख सीताराम कोइरालाले बताए । कोइरालाले भने, ‘कम विद्यार्थी संख्या भएका विद्यालयमा विद्यार्थीको सङ्ख्या बढाउने, विद्यालयमा पूर्वाधार निर्माण गर्ने, जनशक्ति र अन्य स्रोतसाधन उपलब्ध गराउने विद्यालयमा गुणस्तरीय शिक्षा दिने हाम्रो मुख्य उद्देश्य रहेको छ । पछिल्लो समय सामुदायिक विद्यालयप्रतिको आकर्षण बढ्दै गएको भन्दै उनले यही अनुपातमा सामुदायिक विद्यालयमा विद्यार्थी भर्ना गरिरहने हो भने कामपाले आफैंले सामुदायिक विद्यालय सञ्चालन गर्नुपर्ने हुनसक्ने बताए । यसअघि कामपाले अपुग विद्यार्थी भएका सामुदायिक विद्यालयलाई एक आपसमा गाभ्ने विचार गरिरहेको थियो । कोइरालाले अहिले मर्जरको सम्भावनालाई अस्वीकार गरेका छन् । कामपाले सहरका सामुदायिक विद्यालयको सौन्दर्यीकरणका लागि ५ करोड रुपैयाँ विनियोजन गरेको छ भने चालू आर्थिक वर्षमा शिक्षा क्षेत्रमा कामपाले १ अर्ब ३ करोड रुपैयाँभन्दा बढी बजेट विनियोजन गरेको छ ।
