नेपाल विद्युत प्राधिकरणले चिलिमे हाइड्रोपावर कम्पनीबाट उत्पादित २२ मेगावाट विद्युत् भारतबाट निर्यात गर्न स्वीकृति पाएको छ ।
प्राधिकरणका प्रवक्ता सुरेशबहादुर भट्टराईले भारतमा थप विद्युत् निर्यात गर्न भारतको केन्द्रीय विद्युत प्राधिकरणबाट असोज ३१ मा स्वीकृति लिएको पुष्टि गरे ।
यो स्वीकृतिसँगै नेपालले अब भारतमा ३ सय ८६ मेगावाट विद्युत निर्यात गर्ने प्रवक्ता भट्टराईले जानकारी दिए । प्राधिकरणले गत महिना सार्वजनिक गरेको तथ्यांकअनुसार नेपालमा एक अर्ब युनिटभन्दा बढी विद्युत् निर्यात भएको र पछिल्लो तथ्याङ्क छिट्टै सार्वजनिक हुने अपेक्षा गरिएको छ ।
प्राधिकरणले यसअघि चारवटा जलविद्युत् आयोजनाबाट उत्पादित विद्युत्लाई श्रोतको रूपमा हेरेर इन्डियन इनर्जी एक्सचेन्ज लिमिटेड (आइएक्स) को डे-हेड मार्केटमा प्रतिस्पर्धी मूल्यमा १०० दशमलव ९ मेगावाट विद्युत् बिक्री गर्ने प्रस्ताव गरेको थियो ।
प्राधिकरणले लिखुखोला ‘ए’ (२९ मेगावाट), काबेली बी–१ (२५ मेगावाट), माइखोला (२२ मेगावाट), हेवाखोला ए (१५ मेगावाट) र तल्लो मोदी–१ (१० मेगावाट)बाट उत्पादित जलविद्युत निर्यात गर्ने प्रस्ताव गरेको थियो।
त्यस्तै मिस्त्रीखोला, सोलुखोला, चिलिमेलगायत आयोजनाबाट उत्पादित १११ मेगावाट विद्युत् निर्यात गर्ने प्रस्ताव गरिएको छ ।
प्राधिकरणका कार्यकारी निर्देशक कुलमान घिसिङले नेपालबाट विद्युत् निर्यात गर्न भारतबाट अनुमति लिने विश्वास व्यक्त गरे ।
अतिरिक्त विद्युत् निर्यातबाट नेपालले पाँच महिनामा झण्डै आठ अर्ब रुपैयाँ आम्दानी गरेको छ ।
#worldwidekhabar
